தீபாவளிக்கு ‘நோ’ மோதல் - தம்பி கார்த்திக்கு வழிவிட்ட சூர்யா
9/21/2016 3:08:05 PM
விட்டுக்கொடுத்து வாழ்ந்தால் கெட்டுப்போவதில்லை என்ற பழமொழிக்கு உதாரணமாக நிஜ வாழ்க்கையிலும், சினிமா வாழ்க்கையிலும் புரிதலுடன் இருக்கின்றனர் சூர்யா, கார்த்தி. தீபாவளிக்கு சூர்யா நடிக்கும் எஸ் 3, கார்த்தி நடிக்கும் காஷ்மோரா இரண்டு படங்களும் மோத உள்ளதாக கோலிவுட்டில் சலசலப்பு ஓடிக்கொண்டிருந்தது. இரு தரப்பிலிருந்தும் இது பற்றி எந்த விளக்கமும் வராத நிலையில் மோதல் உண்மையாக இருக்குமோ என்றும் சிலர் எண்ணிக்கொண்டிருந்தனர்.
நேரடியாக இல்லாமல் மறைமுகமாக இதற்கு விடையளித்து புரளி பேசியவர்களின் வாயடைத்திருக்கிறார் சூர்யா. எஸ் 3 படம் டிசம்பர் 16ம் தேதி திரைக்கு வரும் என்று ஸ்டுடியோ கிரீன் நிறுவனம் அறிவித்திருக்கிறது. இதன்மூலம் இரண்டு படங்களுக்குள் மோதல் இல்லை என்பதை சொல்லாமல் சொல்லி இருக்கிறார் சூர்யா. டிசம்பர் மாதம் சூர்யாவுக்கு மிகவும் ராசி. அவர் நடித்த ஆறு படம் டிசம்பர் 9ம் தேதி ரிலீஸ் ஆனது. அதேபோல் மவுனம் பேசியதே டிசம்பர் 13ம் தேதி ரிலீஸ் ஆனது. டிசம்பர் என்றாலே சக்ஸஸ்தான் என்பது சூர்யாவின் கணிப்பு. அந்த ராசிக்காகவும் எஸ் 3 ரிலீஸ் தேதியை டிசம்பரில் தேர்வு செய்திருக்கிறார் சூர்யா என அவர் தரப்பு வட்டாரங்கள் கூறுகிறது.
