மாஜி காதலியை மறுமணம் செய்ய மகள் அனுமதிக்கு ஹீரோ வெயிட்டிங்
9/2/2025 4:49:58 PM
விஜயகாந்த் நடித்த ராஜ்ஜியம் படத்தில் நடித்தவர் திலீப். காசி, சாது மிரண்டால், என் மன வானில் படங்களில் நடித்தவர் காவ்யா மாதவன். இருவருமே மலையாளத்தில் பல்வேறு படங்களில் இணைந்து நடித்திருக்கின்றனர். நடிகை மஞ்சு வாரியரை மணந்து விவாகரத்து பெற்றவர் திலீப். நிஷால் சந்திரா என்பவரை மணந்து விவாகரத்து பெற்றவர் காவ்யா. திலீப், காவ்யா மாதவனுக்கு இடையே காதல் மலர்ந்திருப்பதுதான் விவாகரத்துக்கு காரணம் என்றும் பேச்சு உள்ளது. நீண்ட இடைவெளிக்கு பிறகு திலீப், காவ்யா ஜோடி சேர்ந்து நடித்த ‘பின்னேயும்’ சமீபத்தில் திரைக்கு வந்தது. அதில் இருவருக்கும் மீண்டும் நெருக்கம் அதிகரித்தது. இருவரும் திருமணம் செய்யவுள்ளதாக தகவல் பரவி வருகிறது. இதனை மறுத்து வந்தவர்கள் தற்போது மறுமணம் பற்றி கருத்து கூறி உள்ளனர்.
‘காவ்யாவை மறுமணம் செய்வீர்களா?’ என்று திலீப்பிடம் கேட்டபோது,’காவ்யாவை மறுமணம் செய்ய ஒருபோதும் எண்ணியதில்லை. நான் மறுமணம் செய்துகொள்ளும் முடிவு என் மகள் மீனாக்ஷி எடுக்கும் முடிவை பொறுத்துதான் உள்ளது’ என்றார். அதுபோல் காவ்யாவிடம் கேட்டபோது,’கடந்த ஜனவரி 16ம் தேதி எனது திருமணம் குறித்து தகவல் வந்தது. அதன்பிறகு ஒவ்வொரு மாதம் 16ம் தேதியும் அதை கேள்விப்படுகிறேன். மறுமணம் செய்துகொள்ள முடிவு செய்தால் அதை நான் மறைக்க மாட்டேன்’ என்றார்.
