புதுவை சட்டமன்ற தேர்தல்: 77% பேர் டெபாசிட் இழப்பு
5/23/2016 2:34:42 PM
புதுச்சேரி: புதுவையில் 2016 சட்டமன்ற தேர்தலில் 6 முனைப் போட்டி நிலவியது. காங்கிரஸ்- திமுக ஒரு அணியாகவும், என்ஆர் காங்கிரஸ், அதிமுக, பாமக, பாஜக, மநகூ தனித்தனியாகவும் போட்டியிட்டன. மொத்தமுள்ள 30 தொகுதிகளில் இறுதிகட்ட வேட்பாளர் பட்டியலின்படி 344 பேர் களத்தில் நின்றனர். இவர்களில் பொதுத்தொகுதிக்கு போட்டியிட்டவர்கள் ரூ.10 ஆயிரமும், தனித் தொகுதியில் களமிறங்கியவர்கள் ரூ.5 ஆயிரமும் டெபாசிட் தொகை செலுத்தியிருந்தனர்.
தேர்தல் முடிவுகள் வெளியாகிவிட்ட நிலையில், மொத்தம் பதிவான செல்லத்தக்க ஓட்டுகளில் 6ல் ஒருபங்குக்கு மேல் ஓட்டுகளை பெற்ற வேட்பாளர்களுக்கு மட்டுமே டெபாசிட் தொகை திரும்ப வழங்கப்படும். டெபாசிட் இழந்தவர்களின் தொகை அரசின் கஜனாவுக்கு சென்றுவிடும். அதன்படி புதுவையில் போட்டியிட்டவர்களில் 80 வேட்பாளர்கள் மட்டுமே டெபாசிட் தொகையை திரும்ப பெற்றுள்ளனர். மீதமுள்ள 264 பேர் டெபாசிட் தொகையை இழந்துள்ளனர். மொத்தம் 77 சதவீத வேட்பாளர்களின் டெபாசிட் தொகை பறிபோய் உள்ளது.
காங்கிரஸ்-திமுக கூட்டணி தலா 2 தொகுதியில் டெபாசிட் இழந்துள்ளது. என்ஆர் காங்கிரஸ் 8 தொகுதிகளில் டெபாசிட்டை பறிகொடுத்துள்ளது. அதிமுக 16 ெதாகுதியில் டெபாசிட் இழந்துள்ளது. மநகூட்டணியில் இடம்பெற்ற இந்திய கம்யூனிஸ்ட் 6, வி.சிறுத்தை 5, மார்க்சிஸ்ட் 4, மற்றவை 11 இடங்களிலும் டெபாசிட்டை பறிகொடுத்துள்ளது.
இதுதவிர தனித்து போட்டியிட்ட பாமக 24, பாஜக 28 இடங்களில் டெபாசிட் இழந்துள்ளது. மேலும் பகுஜன் சமாஜ், அகில இந்திய மக்கள் முன்னேற்றக் கழகம், இந்திய ஜனநாயக கட்சி, ஜனதா தளம், நாம் தமிழர், சோஷலிஸ்ட், தமிழக வாழ்வுரிமை கட்சி உள்ளிட்ட கட்சிகளும் தான் போட்டியிட்ட அனைத்து இடங்களிலும் டெபாசிட்டை இழந்துள்ளன.
