ராணுவத்தில் ஒரே பதவி ஒரே ஓய்வூதியம் மத்திய அரசு இன்று அறிவிப்பு
9/5/2025 12:36:55 PM
புதுடெல்லி: ஓய்வு பெற்ற ராணுவ வீரர்களின் நீண்ட நாள் கோரிக்கையான ஒரே பதவி ஒரே ஓய்வூதியம் குறித்து பிரதமர் மோடி தலைமையிலான மத்திய அரசு இன்று அறிவிப்பை வெளியிடும் என மத்திய அரசு வட்டாரங்கள் தெரிவித்துள்ளன. இதுகுறித்து மத்திய அரசு வட்டாரங்கள் கூறுகையில், ஒரே பதவி ஒரே ஓய்வூதிய திட்டம் குறித்து மத்திய ராணுவ அமைச்சர் மனோகர் பரிக்கர் இன்று மாலை 3 மணிக்கு இந்த திட்டத்தை அறிவிப்பார். இந்த திட்டத்தை நிறைவேற்ற வலியுறுத்தி ஏராளமான ஓய்வு பெற்ற ராணுவ வீரர்கள் கடந்த 80 நாட்களுக்கும் மேலாக டெல்லி ஜந்தர் மந்தரில் உண்ணாநிலை போராட்டத்தை நடத்தி வருகின்றனர். அவர்களின் கோரிக்கையை நிறைவேற்றும் வகையில் மத்திய அரசு இன்று அறிவிப்பு வெளியிடலாம் என்று எதிர்பார்க்கப்படுகிறது. 2013 ஏப்ரல் மாதத்திலிருந்து திட்டத்தை நிறைவேற்றுவதுடன், நிலுவை தொகையை மொத்தமாக கணக்கிட்டு கொடுக்கவும் மத்திய அரசு திட்டமிட்டுள்ளதாக தெரிகிறது. மேலும் 5 ஆண்டுகளுக்கு ஒருமுறை மாற்றியமைக்கப்படும்.
இது தொடர்பாக ஒரு நபர் கமிஷன் ஒன்றை மத்திய அரசு அமைக்க உள்ளது. திட்டத்தில் ஏதேனும் குறைபாடுகள் உள்ளதா என்பது குறித்து 6 மாதங்களுக்குள் இந்த கமிஷன் அறிக்கை தாக்கல் செய்யும் என்றும் கூறுப்படுகிறது.தற்போதைய கணக்கின்படி 24.25 லட்சத்திற்கும் அதிகமான ஓய்வூ பெற்ற ராணுவ வீரர்களும், சுமார் 6 லட்சம் ராணுவ வீரர்கள் குடும்பத்தினரும் ஓய்வூதிய திட்டத்தின் கீழ் உள்ளனர். ராணுவ வீரர்களின் ஓய்வூதியத்துக்காக மத்திய பட்ஜெட்டில் ரூ.54 ஆயிரம் கோடி ஒதுக்கப்பட்டுள்ளது. இந்த திட்டம் நிறைவேற்றப்பட்டால் ரூ.75 ஆயிரம் கோடி ஒதுக்கப்பட வேண்டியிருக்கும். 85 சதவீத ராணுவ வீரர்கள் 40 வயதுக்கு முன்பே ஓய்வு பெற்று விடுகின்றனர். வெறும் 1 சதவீத ராணுவ வீரர்கள் மட்டுமே 60 வயதில் ஓய்வு பெறுகின்றனர். தற்போது 13 லட்சத்துக்கும் அதிகமான ராணுவ வீரர்கள் பணியில் உள்ளனர். கடந்த ஆட்சியின் போது இந்த திட்டத்தை நிறைவேற்ற அப்போதைய அரசு ரூ.500 கோடி ஒதுக்கியது. ஆனால் இதை நிறைவேற்ற இயலவில்லை. நீண்ட காலமாக கோரிக்கை விடுத்து வரும் ஓய்வு பெற்ற ராணுவ வீரர்களின் போராட்டம் தற்போது ஜந்தர் மந்தரில் 90வது நாளை நெருங்கிக் கொண்டிருக்கிறது. இந்த சூழலில் இன்று மாலை மத்திய அமைச்சர் மனோகர் பரிக்கர் இது குறித்த அறிவிப்பை வெளியிடுவார் என மத்திய அரசு வட்டாரங்கள் தெரிவித்துள்ளன.
