அணியில் இருந்து முற்றிலும் ஒதுக்கப்பட்ட நிலையில் யுவராஜ் சிங்கின் ‘ரிவர்ஸ் ஸ்வீப் சிக்ஸ்’ வீடியோ வைரல்
2/20/2019 3:46:20 PM
மும்பை: இந்திய அணியில் இருந்து முற்றிலும் ஒதுக்கப்பட்ட நிலையில், யுவராஜ் சிங்கின் ‘ரிவர்ஸ் ஸ்வீப் சிக்ஸ்’ வீடியோ ஒன்று தற்போது வைரலாகி வருகிறது. அவர் ஐபிஎல் போட்டிக்கு தயாராவதால் ரசிகர்கள் மகிழ்ச்சி அடைந்துள்ளனர். கடந்த 2011ம் ஆண்டு நடந்த உலகக் கோப்பையில் தொடர் நாயகர் விருதை வென்ற இந்திய கிரிக்கெட் அணியின் நாயகன் யுவராஜ் சிங்கை யாரும் மறக்க முடியாது. புற்றுநோயில் இருந்து போராடி மீண்டு வந்து, மீண்டும் இந்திய அணியில் இடம் பிடித்தார். ஆனால், 2011ம் ஆண்டுக்கு முந்தைய தனது அபாரமான விளையாட்டை அவரால் வெளிப்படுத்த முடியவில்லை. இருந்தும் ஐபிஎல் போட்டிகளில் 2015ம் ஆண்டு வரை சிறப்பாக விளையாடினாலும், பெரிய அளவில் களத்தில் சோபிக்கவில்லை. அவ்வப்போது இந்திய அணியில் சேர்ப்பதும், நீக்கப்படுவதும் வாடிக்கையாக இருந்த நிலையில், தற்போது எந்த வாய்ப்பும் அவருக்கு கொடுக்கப்படாமல் முற்றிலுமாக ஒதுக்கப்பட்டுவிட்டார்.
இந்நிலையில் இந்தாண்டு நடைபெறவுள்ள ஐபிஎல் தொடரில் கூட, அவரை எந்த அணியும் எடுக்க ஆர்வம் காட்டவில்லை. கடைசி சுற்றில் தான் மும்பை அணி யுவராஜை தேர்வு செய்தது. அதுவும், அடிப்படை விலையான ரூ. 1 கோடிக்கே அவரை வாங்கியது. இதுகுறித்து, யுவராஜ் சிங் கூறுைகயில், “கிரிக்கெட் எனக்கு எல்லாவற்றையும் கொடுத்துள்ளது. நான் கிரிக்கெட்டை விட்டு வெளியேறும் போது, என்னுடைய சிறப்பான நிலையை வெளிப்படுத்த வேண்டும். நான் வருத்தத்துடன் வெளியேற விரும்பவில்லை” என்றார்.
இதற்கிடையே வருகிற ஐபிஎல் தொடருக்கு அவர் தயாராகி வரும் நிலையில், மாலத்தீவில் நட்பு ரீதியில் நடந்த கிரிக்கெட் போட்டியில் பங்கேற்றார். அங்கு பேட்டிங் செய்த யுவராஜ் சிங், ‘ரிவர்ஸ் ஸ்வீப் சிக்ஸ்’ அடித்த வீடியோ ஒன்று தற்போது வைரல் ஆகியுள்ளது. ஏற்கனவே நட்சத்திர வீரர்களான தோனி, கோலி, ரோஹித் போன்றோர் சமூக தளங்களை ஆக்கிரமித்து, அவர்களுக்கான ஹெஷ்டேக்குகளுக்கு மத்தியில், யுவராஜ் சிங் போன்றோரின் ஹேஷ்டேக்குகள் தற்போது வைரலாகி வருவதால் ரசிகர்கள் மகிழ்ச்சியில் உள்ளனர். இன்றைய நிலையில், யுவராஜ் சிங் ஐபிஎல் போட்டிக்கு தயாராகி வருவது, ‘யுவ’ என்று அன்போடு அழைக்கப்படும் அவரது ரசிகர்கள் மத்தியில் கொண்டாட்டத்தை ஏற்படுத்தி உள்ளது.
