வங்கிகளுக்கான ரெப்போ வட்டி விகிதத்தில் மாற்றமில்லை: ரிசர்வ் வங்கி ஆளுநர் அறிவிப்பு
12/4/2020 5:14:04 PM
புதுடெல்லி: வங்கிகளுக்கான ரெப்போ வட்டி விகிதத்தில் எவ்வித மாற்றமும் இல்லை என்று, ரிசர்வ் வங்கி ஆளுநர் சக்தி காந்த தாஸ் தெரிவித்தார். ரெப்போ விகிதம் என்பது ரிசர்வ் வங்கி, வங்கிகளுக்கு கடன் கொடுக்கும் வீதமாகும். உண்மையில், வங்கிகளுக்கு நிதி பற்றாக்குறை ஏற்படும் போதெல்லாம், அவர்கள் அதை ஈடுசெய்ய மத்திய வங்கியிலிருந்து அதாவது ரிசர்வ் வங்கியிடமிருந்து பணம் எடுக்கிறார்கள். ரிசர்வ் வங்கி வழங்கிய இந்த கடன் ஒரு நிலையான விகிதத்தில் கிடைக்கிறது. இந்த விகிதம் ரெப்போ வீதம் என்று அழைக்கப்படுகிறது. இந்திய ரிசர்வ் வங்கி அதை காலாண்டு அடிப்படையில் தீர்மானிக்கிறது. இந்நிலையில், ரிசர்வ் வங்கி ஆளுநர் சக்திகாந்த தாஸ் இன்று கூறுகையில், ‘இந்திய ரிசர்வ் வங்கியின் நாணயக் கொள்கைக் குழு (எம்.பி.சி) பரிந்துரையின்படி ரெப்போ வட்டி விகிதம் 4 சதவீதமாகவே நீடிக்கும்.
அதில், எந்த மாற்றம் இல்லை. ரிவர்ஸ் ரெப்போ விகிதம் 3.35 சதவீதமாக இருக்கும். 2021ம் ஆண்டிற்கான மொத்த உள்நாட்டு உற்பத்தியில் முந்தைய திட்டமிடப்பட்ட - 9.5%க்கு எதிராக -7.5% ஆக இருக்கும். பொருளாதாரத்தில் போதுமான பணம் கிடைப்பதை உறுதி செய்வோம். தேவைப்பட்டால் தேவையான நடவடிக்கைகளை எடுப்போம். பொருளாதார குறியீடுகள் விரைவான முன்னேற்றத்தைக் காட்டுகிறது. பல்வேறு துறைகளும் முன்னேற்றப் பாதைக்கு திரும்புகின்றன. சில்லறை பணவீக்கம் தற்போது திருப்திகரமாக உள்ளது’ என்றார்.
ரிசர்வ் வங்கி ஆளுநர் சக்தி காந்த தாஸ் தலைமையிலான 6 உறுப்பினர்களைக் கொண்ட நாணயக் கொள்கைக் குழு (எம்.பி.சி), தொடர்ச்சியாக மூன்றாவது முறையாக ரெப்போ விகிதங்களையும், தலைகீழ் ரெப்போ விகிதங்களையும் அப்படியே வைத்திருக்கிறது. ரெப்போ வீதம் 4 சதவீதம், தலைகீழ் ரெப்போ வீதம் 3.35 சதவீதம், பண இருப்பு விகிதம் 3 சதவீதம், வங்கி வீதம் 4.25 சதவீதம் அளவில் உள்ளது குறிப்பிடத்தக்கது.
