ஜனவரியில் அரசியல் கட்சி துவக்கம்: நடிகர் ரஜினிகாந்த் அறிவிப்பு
12/3/2020 6:40:57 PM
சென்னை: ஜனவரியில் அரசியல் கட்சி துவங்க இருப்பதாகவும் அதற்கான தேதியை டிசம்பர் 31ல் அறிவிப்பதாகவும் நடிகர் ரஜினிகாந்த் அறிவித்துள்ளார்.கடந்த 2017ம் ஆண்டு ரசிகர்களை சந்தித்த ரஜினிகாந்த், தீவிர அரசியலில் குதிக்க இருப்பதாகவும் அரசியல் கட்சி துவங்க உள்ளதாகவும் தெரிவித்தார். பின்னர் தனது ரசிகர் மன்றத்தை மக்கள் மன்றமாக பெயர் மாற்றம் செய்தார். தமிழகம் முழுவதும் மக்கள் மன்றத்துக்கு புதிய நிர்வாகிகளை நியமித்தார். பூத் கமிட்டி அமைத்தல், உறுப்பினர்களை சேர்த்தல், நலத்திட்ட பணிகளில் ஈடுபடுதல் என மக்கள் மன்ற நிர்வாகிகள் பணியாற்றி வந்தனர். இந்த ஆண்டு துவக்கத்தில் பத்திரிகையாளர்களை சந்தித்த ரஜினி, ‘கட்சி ஆரம்பித்த பிறகு அதற்கு தலைமை மட்டும் ஏற்பேன். முதல்வர் வேட்பாளராக களம் இறங்க மாட்டேன்’ என்றார். அவரது இந்த முடிவால் மக்கள் மன்ற நிர்வாகிகள், ரசிகர்கள் அதிருப்தி அடைந்தனர்.
இந்நிலையில் சில வாரங்களுக்கு முன், ரஜினிகாந்த் எழுதியதாக ஒரு கடிதம் வெளியானது. அதில், ‘எனக்கு சிறுநீரக மாற்று அறுவை சிகிச்சை நடந்துள்ளது. கொரோனா காலத்தில் மக்களை சந்திப்பது சரி கிடையாது என டாக்டர்கள் அறிவுறுத்தியுள்ளனர். மக்களை சந்திக்காமல், நேரடி பிரசாரத்தில் ஈடுபடாமல் கட்சியை ஆரம்பிப்பதில் சிக்கல் உள்ளது’ என தெரிவித்து இருந்தார். இந்த கடிதம் வெளியானதும் பரபரப்பு ஏற்பட்டது. இந்த கடிதத்தை நான் எழுதவில்லை. ஆனால் எனது உடல்நிலை பற்றி இதில் இருக்கும் தகவல்கள் உண்மை என ரஜினிகாந்த் கூறினார். மேலும், மக்கள் மன்ற நிர்வாகிகளிடம் கலந்து ஆலோசித்த பிறகு எனது அரசியல் நிலைப்பாட்டை தெரிவிப்பேன் என அவர் கூறியிருந்தார்.
இந்நிலையில் தமிழகத்திலுள்ள ரஜினி மக்கள் மன்ற அனைத்து மாவட்ட செயலாளர்களுக்கும் சென்னைக்கு வரும்படி அழைப்பு விடுக்கப்பட்டது. அதன்படி, சென்னை கோடம்பாக்கத்திலுள்ள ரஜினியின் ராகவேந்திரா திருமண மண்டபத்தில் கடந்த நவம்பர் 30ம் தேதி மாவட்ட செயலாளர்கள் ஆலோசனை கூட்டம் நடைபெற்றது. அப்போது அரசியல் கட்சி துவங்குவது பற்றியும் தனது உடல் நிலை பற்றியும் ரஜினி பேசினார். கட்சி தொடங்கலாமா, வேண்டாமா என மாவட்ட செயலாளர்களிடம் அவர் ஆலோசனை நடத்தினார். இதையடுத்து பத்திரிகையாளர்களை சந்தித்த ரஜினி, தனது அரசியல் நிலைப்பாடு குறித்து விரைவில் அறிவிப்பதாக தெரிவித்தார்.
இந்நிலையில் தனது டிவிட்டர் பக்கத்தில் ரஜினிகாந்த் கூறியிருப்பதாவது:ஜனவரியில் கட்சி துவக்கம். டிசம்பர் 31ல் தேதி அறிவிப்பு. மாத்துவோம். எல்லாத்தையும் மாத்துவோம். இப்போ இல்லேன்னா எப்பவும் இல்ல. வரப்போகிற சட்டசபை தேர்தலில் மக்களுடைய பேராதரவுடன் வெற்றி பெற்று, தமிழகத்தில் நேர்மையான, நாணயமான, வெளிப்படையான, ஊழலற்ற, ஜாதி மதச் சார்பற்ற ஆன்மிக அரசியல் உருவாகுவது நிச்சயம். அற்புதம், அதிசயம் நிகழும். இவ்வாறு ரஜினிகாந்த் கூறியுள்ளார்.
