சந்தன வீரப்பனுக்கு சிம்ம சொப்பனமாக விளங்கிய மாஜி போலீஸ் அதிகாரி சிலை திறப்பு
12/6/2018 3:32:12 PM
மேட்டூர்: சந்தனவீரப்பனுக்கு சிம்ம சொப்பனமாக விளங்கிய சேலம் முன்னாள் போலீஸ் அதிகாரிக்கு பிறந்தநாளில் வெண்கலச்சிலை அமைத்து திறக்கப்பட்டுள்ளது. சேலம் மாவட்டம் மேட்டூர் கேம்ப் பகுதியைச் சேர்ந்தவர் கோபாலகிருஷ்ணன் (வயது 61). முன்னாள் ஐ.பி.எஸ். அதிகாரியான இவர், சேலம் மாநகர போலீஸ் கமிஷனராக பணியாற்றி உள்ளார். இவர் கடந்த 2008ம் ஆண்டு பணியில் இருந்து ஓய்வு பெற்றார். இதையடுத்து இளைஞர்களுக்கு காவல்துறையில் சேர பயிற்சி அளித்து வந்தார். இந்நிலையில் 2016ம் ஆண்டு, ெசப்டம்பர் 11ம்தேதி, உடல்நலம் பாதிக்கப்பட்டு சிகிச்சை பலனின்றி மரணமடைந்தார். அவரது உடல் மேட்டூர் தங்கமாபுரி பட்டணம் பெரியார் நகரில் உள்ள பண்ணைத் தோட்டத்தில் அடக்கம் செய்யப்பட்டது. இந்நிலையில் அவரது 2ம்ஆண்டு நினைவு தினம் கடந்த செப்டம்பர் மாதம் 11ம்தேதி அனுசரிக்கப்பட்டது.
அப்ேபாது அவருக்கு 6அடி உயரத்தில் வெண்கல சிலை வடிவமைக்கப்பட்டு அவரது குடும்பத்தினர், அந்த சிலைக்கு அஞ்சலி செலுத்தினர். இந்த சிலையின் திறப்பு விழா, டிசம்பர் 5ம்தேதி(நேற்று) நடக்கும் என்று அறிவித்திருந்தனர். அதன்படி குடும்பத்தினர், நேற்று சிலையை திறந்து வைத்தனர். அவரது தங்கை ரேணுகா, தம்பிகள் விஜயன், ஜாக் மற்றும் உடன் பணியாற்றிய அதிகாரிகள் உள்பட பலர் நிகழ்ச்சியில் கலந்து கொண்டனர். 1949ம் ஆண்டு மேட்டூரில் பிறந்த கோபாலகிருஷ்ணன், 1982ல் காவல்துறையில் டிஎஸ்பியாக பணிக்கு சேர்ந்தார். இவர், போலீஸ் சூப்பிரண்டாக பணியாற்றிய காலத்தில், சந்தன கடத்தல் வீரப்பனை பிடிக்க அமைக்கப்பட்ட தனிப்படையில் பணியாற்றி வீரப்பனுக்கு சிம்ம சொப்பனமாக விளங்கினார். கடந்த 1993ம் ஆண்டு தமிழக-கர்நாடக வனப்பகுதியில் சந்தன கடத்தல் வீரப்பனை தேடுதல் வேட்டையில் ஈடுபட்டபோது,
வீரப்பன் கும்பல் வைத்த கண்ணி வெடியில் சிக்கி கோபாலகிருஷ்ணன் உள்பட 10க்கும் மேற்பட்ட போலீசார் படுகாயம் அடைந்தனர். அந்தக் கண்ணிவெடி தாக்குதலில் 24 காவலர்கள் வெடித்துச் சிதறினர். இந்தச் சம்பவத்தில் கோபாலகிருஷ்ணன், கால் மற்றும் இடுப்பு எலும்பு முறிவு காயங்களுடன் அதிர்ஷ்டவசமாகப் உயிர் தப்பினார். அந்தச் சம்பவம், தமிழகம்-கர்நாடகாவில் பெரும் அதிர்வலைகளை ஏற்படுத்தியது. வீரப்பனை பிடித்தால்தான் திருமணம் செய்வேன் என்று இவர் சபதம் செய்திருந்தார். ஆனால் இவர் தேடுதல்வேட்டை குழுவில் இருந்த காலக்கட்டத்தில் வீரப்பனை பிடிக்க முடியாததால் திருமணம் செய்யாமல் இருந்தார் என்பது குறிப்பிடத்தக்கது. வீரப்பன் தேடுதல் வேட்டையின்போது பலியான வேலூரை சேர்ந்த போலீஸ் அதிகாரி ஒருவருக்கு, இதற்கு முன்பு சிலை அமைக்கப்பட்டுள்ளதும் குறிப்பிடத் தக்கது.
